തിരുവനന്തപുരം: സര്ക്കാരിന്റെ നവകേരള സിറ്റിസണ്സ് റെസ്പോണ്സ് പ്രോഗ്രാമിന് ഹൈക്കോടതിയില് തിരിച്ചടി. മുഖ്യമന്ത്രി പിണറായി വിജയന് പ്രഖ്യാപിച്ച ക്യാമ്പെയിന് ഹൈക്കോടതി റദ്ദാക്കി. രാഷ്ട്രീയ ക്യാമ്പെയിനുകളുടെ മറവില് സര്വേ പാടില്ലെന്ന് ഹൈക്കോടതി വ്യക്തമാക്കി.
ചീഫ് ജസ്റ്റിസ് അധ്യക്ഷനായ ഡിവിഷന് ബെഞ്ചിന്റേതാണ് ഉത്തരവ്. ക്യാമ്പെയിന് സാമ്പത്തിക നിയമത്തിന്റെ വ്യതിചലനമാണെന്നും ഹൈക്കോടതി ചൂണ്ടിക്കാട്ടി. കഴിഞ്ഞ വര്ഷം മുഖ്യമന്ത്രി പ്രഖ്യാപിച്ച ക്യാമ്പെയിന് ഈ വര്ഷം ആദ്യമാണ് ആരംഭിച്ചത്. രണ്ട് മാസം നീണ്ടു നില്ക്കുന്നതായിരുന്നു സര്വേ.
സംസ്ഥാനത്താകെ സന്നദ്ധ സേനാംഗങ്ങള് ജനങ്ങള്ക്കരികിലെത്തി പഠനം നടത്തുമെന്നായിരുന്നു മുഖ്യമന്ത്രിയുടെ പ്രഖ്യാപനം. ജനങ്ങളുടെ അഭിപ്രായങ്ങളും നിര്ദേശങ്ങളും ശേഖരിച്ച് പഠന റിപ്പോര്ട്ട് തയ്യാറാക്കാനായിരുന്നു പദ്ധതി. ഇത് ക്രോഡീകരിച്ച് വരുംകാലത്തേക്കുള്ള നാടിന്റെ പുരോഗതി എങ്ങനെയാകണമെന്നുള്ള രൂപരേഖ തയ്യാറാക്കുമെന്നും മുഖ്യമന്ത്രി പ്രഖ്യാപിച്ചിരുന്നു.
